आमच्या वझरेचा अभिमानास्पद इतिहास आणि वारसा

वझरे भरडवडी गावचे ग्रामदैवत श्री काळामादेवी मंदिर आहे. हे मंदिर गावाचे प्रमुख श्रद्धास्थान असून परिसरातील भाविकांचे अत्यंत महत्त्वाचे दैवत मानले जाते. काळामादेवी मंदिरास प्रतिवर्षी मोठ्या संख्येने भाविक भेट देतात आणि विशेषतः सण-उत्सवाच्या काळात येथे मोठी गर्दी पाहायला मिळते.

हे काळामादेवी मंदिर गावापासून सुमारे एक किलोमीटर अंतरावर असून हे मंदिर पुरातन काळातील आहे. मंदिराच्या मालकीची सुमारे सात एकर जमीन असून त्या संपूर्ण परिसरामध्ये सुमारे एक हजार वृक्षांची लागवड करण्यात आलेली आहे. या वृक्षलागवडीत आंबा, फणस, काजू, सिल्वर ओक, खैर, कोकम तसेच विविध प्रकारच्या स्थानिक वनस्पती व झाडांचा समावेश आहे.

काळामादेवी मंदिराच्या परिसरात प्रशस्त पटांगण असून चारी बाजूंनी वृक्षारोपण करण्यात आलेले आहे. येथे येणाऱ्या भाविकांना पिण्याच्या पाण्याची अडचण भासू नये म्हणून दोन बोअरवेल मारण्यात आलेले असून भरपूर प्रमाणात पाणीसाठा उपलब्ध आहे.

काळामादेवी मंदिर हे दोडामार्ग परिसरातील एक नामांकित देवस्थान म्हणून ओळखले जाते. श्रावण महिन्यात या मंदिरात मोठ्या प्रमाणावर भाविक दर्शनासाठी येतात. या काळात विशेष पूजा व धार्मिक विधी पार पडतात. तसेच दसऱ्याच्या काळात येथे यात्रेसारखी मोठी गर्दी होते. या यात्रेस साधारणपणे वीस ते पंचवीस हजार भाविक उपस्थित राहतात. विशेष बाब म्हणजे ही यात्रा अतिशय शांततेत व भक्तिभावाने पार पडते.